ശ്രീനഗർ: മുതിർന്ന ബിജെപി നേതാവും ജമ്മു കശ്മീർ എംഎൽഎയുമായ ദേവേന്ദർ സിങ് റാണ അന്തരിച്ചു. 59 വയസ്സായിരുന്നു. ഹരിയാനയിലെ സ്വകാര്യ ആശുപത്രിയിലായിരുന്നു അന്ത്യം. കേന്ദ്ര മന്ത്രി ജിതേന്ദ്ര സിങിന്റെ സഹോദരനാണ്.
ജമ്മു കശ്മീർ മുഖ്യമന്ത്രി ഒമർ അബ്ദുള്ളയുടെ മുൻ സഹായിയായ ദേവേന്ദർ സിങ് റാണ, 2021-ലാണ് ബിജെപിയിൽ ചേർന്നത്. മുമ്പ് നാഷണൽ കോൺഫറൻസ് എംഎൽഎ ആയിരുന്നു. വ്യവസായ രംഗത്ത് വ്യക്തിമുദ്ര പതിപ്പിച്ചിട്ടുള്ള ദേവേന്ദർ സിങ് ഇക്കഴിഞ്ഞ തിരഞ്ഞെടുപ്പിൽ നഗ്രോട്ടയിൽ നിന്നാണ് ജമ്മു കശ്മീർ നിയമസഭയിലേക്ക് തിരഞ്ഞെടുക്കപ്പെട്ടത്.
ഉത്തരേന്ത്യയിലെ മാരുതി സുസുക്കിയുടെ ഏറ്റവും വലിയ ഡീലർമാരായ ജംകാശ് വെഹിക്ലീഡ്‌സിന്റെ സ്ഥാപകനാണ് അദ്ദേഹം.
ഭാര്യ: ഗഞ്ജൻ റാണ, മക്കൾ: ദേവ്യാനി, കേത്കി, ആധിരാജ് സിങ്
