വാരാണസി: ഉത്തർപ്രദേശിലെ വാരാണസി ജംഗ്ഷൻ റെയിൽവേ സ്റ്റേഷനിലെ പാർക്കിങ് ഏരിയയിൽ വൻ തീപ്പിടിത്തം. തീപിടിത്തത്തിൽ 200-ഓളം ഇരുചക്ര വാഹനങ്ങൾ കത്തിനശിച്ചു. ശനിയാഴ്ച പുലർച്ചെയായിരുന്നു സംഭവം.
അഗ്നിരക്ഷാ സേനാ ഉദ്യോഗസ്ഥർ സ്ഥലത്തെത്തിയിരുന്നു. പന്ത്രണ്ടോളം ഫയർ എഞ്ചിനുകളാണ് തീയണക്കാനെത്തിയത്. റെയിൽവേ പോലീസ്, ആർപിഎഫ്, പ്രാദേശിക പോലീസ് എന്നിവരും സ്ഥലത്തെത്തിയിട്ടുണ്ട്. രണ്ട് മണിക്കൂറെടുത്താണ് തീയണച്ചത്. ഇതിന്റെ വീഡിയോകൾ ഇതിനകം സമൂഹ മാധ്യമങ്ങളിൽ പ്രചരിക്കുന്നുണ്ട്.
സംഭവത്തിൽ ആളപായമില്ല. ഷോർട്ട് സർക്ക്യൂട്ട് ആണ് അപകടകാരണം എന്നാണ് പ്രാഥമിക നിഗമനം. ബൈക്കുകൾക്കൊപ്പം സൈക്കിളുകളും കത്തിനശിച്ചിട്ടുണ്ട്. വാഹനങ്ങളിൽ ഭൂരിഭാഗവും റെയിൽവേ ജീവനക്കാരുടേതാണ്.
