നടി തൃഷയുടെ എക്സ് അക്കൗണ്ട് ഹാക്ക് ചെയ്യപ്പെട്ടു. താരം തന്നെയാണ് ഇൻസ്റ്റഗ്രാം വഴി തന്റെ അക്കൗണ്ട് ഹാക്ക് ചെയ്യപ്പെട്ട വിവരം അറിയിച്ചത്. അക്കൗണ്ട് വീണ്ടെടുക്കാനുള്ള ശ്രമങ്ങൾ നടക്കുകയാണെന്നും തന്റെ അക്കൗണ്ടിൽ വരുന്ന പോസ്റ്റുകൾ ശ്രദ്ധിക്കരുതെന്നും അവർ ഇൻസ്റ്റഗ്രാം സ്റ്റോറിയിൽ പറയുന്നു.
ടൊവിനോ തോമസ് നായകനായ ഐഡന്റിറ്റി, അജിത്തിന്റെ വിടാമുയർച്ചി എന്നീ സിനിമകളാണ് ഈ വർഷം തൃഷയുടേതായി ഇതുവരെ റിലീസ് ചെയ്തത്. ജനുവരി ആദ്യം റിലീസ് ചെയ്ത ഐഡന്റിറ്റിയിൽ അലീഷ എന്ന കഥാപാത്രത്തെയാണ് നടി അവതരിപ്പിച്ചത്.
വിടാമുയർച്ചിയിൽ കയൽ എന്ന കഥാപാത്രത്തെയാണ് നടി അവതരിപ്പിച്ചത്. നടൻ അജിത്തിന്റെ ഭാര്യ വേഷത്തിലാണ് തൃഷ എത്തിയത്. പൂർണ്ണമായും അസർബൈജാനിൽ ഷൂട്ട് ചെയ്ത ചിത്രം തിയേറ്ററിൽ പ്രദർശനം തുടരുകയാണ്.
തൃഷ അഭിനയം നിർത്തുന്നുവെന്ന തരത്തിൽ അടുത്തിടെ അഭ്യൂഹം പരന്നിരുന്നു. അഭിനയം അവസാനിപ്പിച്ച് തൃഷ നടൻ വിജയ് ആരംഭിച്ച തമിഴ് വെട്രി കഴകം പാർട്ടിയിൽ അംഗമാകും എന്നായിരുന്നു അഭ്യൂഹം. എന്നാൽ ഈ വിഷയം തൃഷയുടെ കുടുംബം തള്ളിക്കളഞ്ഞു.
തൃഷ അഭിനയിച്ച അര ഡസൻ സിനിമകളാണ് പുറത്തുവരാനുള്ളത്. അജിത്തിനൊപ്പം തന്നെ അഭിനയിച്ച മറ്റൊരു ചിത്രമായ ഗുഡ് ബാഡ് അഗ്ലി ഏപ്രിലിൽ റിലീസ് ചെയ്യുമെന്നാണ് റിപ്പോർട്ട്. കൂടാതെ മണിരത്നം സംവിധാനം ചെയ്ത തഗ് ലൈഫ് എന്ന സിനിമയും വരാനുണ്ട്.
