ന്യൂഡൽഹി: കൂട്ടപ്പിരിച്ചുവിടലിന് ഒരുങ്ങി ജർമ്മൻ ലോജിസ്റ്റിക് ഭീമനായ ഡിഎച്ച്എൽ. 8000 ജീവനക്കാരെ പിരിച്ചുവിടാനാണ് കമ്പനി പദ്ധതിയിട്ടിരിക്കുന്നത്. വാർഷിക പ്രവർത്തന ലാഭത്തിൽ 7.2 ശതമാനം ഇടിവ് നേരിട്ട പശ്ചാത്തലത്തിലാണ് തീരുമാനം. ഇതിലൂടെ 108 കോടി ഡോളർ ലാഭിക്കാൻ കഴിയുമെന്നാണ് കമ്പനി കണക്കുകൂട്ടുന്നത്.

മൊത്തം തൊഴിൽശേഷിയുടെ ഒരു ശതമാനത്തിലധികം പേരെയാണ് പുതിയ തീരുമാനം ബാധിക്കുക. പോസ്റ്റ് ആന്റ് പാഴ്‌സൽ ജർമ്മനി ഡിവിഷനിലാണ് ഇത് നടപ്പാക്കുക. കമ്പനിയുടെ വളർച്ച മെച്ചപ്പെടുത്താൻ ഉതകുന്ന പ്ലാൻ പ്രകാരമാണ് നടപടി.

നിർബന്ധിത പിരിച്ചുവിടലുകൾക്ക് പകരം ജീവനക്കാരെ ഘട്ടംഘട്ടമായി കുറച്ച് ഇത് നടപ്പാക്കുകയാണ് ലക്ഷ്യമെന്ന് സിഇഒ ടോബിയാസ് മേയർ റോയിട്ടേഴ്സിനോട് പറഞ്ഞു. ലോകമെമ്പാടുമുള്ള 220 ലധികം രാജ്യങ്ങളിലായി ഏകദേശം 602,000 ആളുകളാണ് കമ്പനിയുടെ കീഴിൽ ജോലി ചെയ്യുന്നത്. പോസ്റ്റ് ആന്റ് പാഴ്‌സൽ ജർമ്മനി യൂണിറ്റിൽ 1,90,000 ജീവനക്കാരുണ്ട്.