തിരുവനന്തപുരം: സംസ്ഥാനത്ത് സ്വർണവിലയിൽ ചാഞ്ചാട്ടം തുടരുന്നു. ഒന്നിടവിട്ട ദിവസങ്ങളിൽ കൂടിയും കുറഞ്ഞും നിൽക്കുന്ന സ്വർണവില ഇന്ന് വീണ്ടും വർധിച്ചു. പവന് 200 രൂപയാണ് വർധിച്ചത്. 73,880 രൂപയാണ് ഇന്ന് ഒരു പവൻ സ്വർണത്തിന്റെ വില. ഗ്രാമിന് ആനുപാതികമായി 25 രൂപയാണ് വർധിച്ചത്. 9235 രൂപയാണ് ഒരു ഗ്രാം സ്വർണത്തിന്റെ വില.
ജൂൺ 13നാണ് ഏപ്രിൽ 22ലെ റെക്കോർഡ് സ്വർണവില ഭേദിച്ചത്. ഏപ്രിൽ 22ന് രേഖപ്പെടുത്തിയ 74,320 രൂപ എന്ന റെക്കോർഡ് ആണ് തിരുത്തിയത്. തൊട്ടടുത്ത ദിവസവും വില വർധിച്ച് സ്വർണവില പുതിയ ഉയരം കുറിക്കുന്നതാണ് കണ്ടത്. 75,000 കടന്നും കുതിക്കുമെന്ന സൂചനയ്ക്കിടെ പിന്നിടുള്ള ദിവസങ്ങളിൽ സ്വർണവില ഏറിയും കുറഞ്ഞും നിൽക്കുന്ന കാഴ്ചയാണ് ദൃശ്യമായത്.
ഇറാൻ- ഇസ്രയേൽ സംഘർഷം അടക്കമുള്ള വിഷയങ്ങളാണ് ഈ ദിവസങ്ങളിൽ സ്വർണവിലയെ സ്വാധീനിക്കുന്നത്. സുരക്ഷിത നിക്ഷേപം എന്ന നിലയിൽ സ്വർണത്തിലേക്ക് കൂടുതൽ ആളുകൾ ഒഴുകി എത്തിയതാണ് സ്വർണവില ഉയർന്നു നിൽക്കാൻ കാരണമെന്ന് വിപണി വിദഗ്ധർ പറയുന്നു.
