ന്യൂഡൽഹി: കനത്ത മഴയെ തുടർന്ന് ഡൽഹിയിലെ വിവിധയിടങ്ങളിൽ വെള്ളക്കെട്ട് രൂപപ്പെട്ടു. ഇന്ന് ഉച്ചയ്ക്ക് ശേഷം ഡൽഹിയിൽ മഴ ശക്തമായി. ആർകെ പുരം പ്രദേശത്ത് കനത്ത മഴയാണ് ലഭിച്ചിരിക്കുന്നത്. അടുത്ത ആഴ്ച ഡൽഹിയിലും പരിസര പ്രദേശങ്ങളിലും കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി.
ശനി, ഞായർ വരെ നേരിയ തോതിൽ മഴ പെയ്യാൻ സാധ്യതയുണ്ട്. ജൂലൈ 17 വരെ പരമാവധി താപനില 32-34 ഡിഗ്രിയിൽ തുടരാനാണ് സാധ്യത. കനത്ത മഴയെ തുടർന്ന് വെള്ളക്കെട്ട് രൂപപെട്ടതോടെ നഗരത്തിൽ ഗതാഗത കുരുക്ക് രൂക്ഷമാണ്. വെള്ളക്കെട്ട് കാരണം ദുർബലമായ സ്ഥലങ്ങളിലെ അണ്ടർപാസുകൾ താൽക്കാലികമായി അടച്ചേക്കുമെന്നും റിപ്പോർട്ടുണ്ട്.
