ന്യൂഡൽഹി: 79ാം സ്വാതന്ത്ര്യ ദിനാഘോഷത്തിന്റെ ഭാഗമായി പ്രധാനമന്ത്രി നരേന്ദ്ര മോദി ചെങ്കോട്ടയിൽ ദേശീയ പതാകയുയർത്തി. രാജ്ഘട്ടിലെത്തി മഹാത്മാഗാന്ധിയുടെ സ്മൃതി മണ്ഡപത്തിൽ ആദരാഞ്ജലി അർപ്പിച്ചാണ് പ്രധാനമന്ത്രി ചെങ്കോട്ടയിലെത്തിയത്. ചെങ്കോട്ടയിൽ 96 പേരുള്ള സംഘമാണ് ഗാർഡ് ഓഫ് ഓണർ നൽകിയത്.

പ്രതിരോധ മന്ത്രി രാജ് നാഥ് സിങ്, ആഭ്യന്തര മന്ത്രി അമിത് ഷാ ഉൾപ്പെടെയുള്ളവർ ചെങ്കോട്ടയിലെത്തി. ദേശീയ പതാക ഉയർത്തുന്നതിനിടയിൽ ഹെലികോപ്ടറിൽ പുഷ്പവൃഷ്ടി നടത്തി. ഹെലികോപ്ടറുകളിൽ ഒന്നിൽ ഓപ്പറേഷൻ സിന്ദൂർ എന്ന് എഴുതിയിരുന്നു. പതാക ഉയർത്തിയതിന് പിന്നാലെ രാജ്യത്തെ അഭിസംബോധന ചെയ്ത് പ്രധാനമന്ത്രി സംസാരിച്ചു.

ഇന്ത്യയുടെ വീരനായകൻമാർ നേടി തന്ന പോരാട്ട വീര്യത്തിന് ഇന്ന് 79 വയസ്സ് തികയുന്നു. ഇന്ത്യയെ ഉന്മൂലനം ചെയ്യാൻ എത്തിയ വെള്ളപ്പടയെ ഇന്ത്യൻ ജനതകൾ ആട്ടിപ്പായിച്ചിട്ട് ഇന്നേക്ക് 79 വർഷങ്ങൾ. ഇന്ത്യൻ ജനതയുടെ ഇച്ഛാശക്തിക്കു മുമ്പിൽ ബ്രിട്ടീഷ് ഭരണക്കൂടത്തിന് അടിയറവ് പറയേണ്ടിവന്ന ദിവസം.

1947, ഓഗസ്റ്റ് 15. ഈ ദിനത്തിന് ഒരുപാട് കഥകൾ പറയാനുണ്ട്. സത്യവും അഹിംസയും കൈമുതലാക്കി ഇന്ത്യ നേടിയെടുത്ത സ്വാതന്ത്രത്തിന്റെ കഥ. വരും തലമുറയ്ക്കായി ധീര രക്തസാക്ഷികൾ ജീവൻ ബലിയർപ്പിച്ചതിന്റെ കഥ.

നൂറ്റാണ്ടുകൾ നീണ്ടുനിന്ന പോരാട്ടങ്ങൾക്കും ത്യാഗങ്ങൾക്കും ഒടുവിൽ ഇന്ത്യ സ്വാതന്ത്ര്യത്തിന്റെ പുലരിയിലേക്ക് കണ്ണുതുറന്ന ദിനമാണ് ഓഗസ്റ്റ് 15. ഇന്ത്യയുടെ സ്വാതന്ത്ര്യസമരം കേവലം ഒരു സമരമായിരുന്നില്ല, മറിച്ച് ഒരു ജനതയുടെ സ്വപ്നങ്ങളുടെയും ആത്മാഭിമാനത്തിന്റെയും പോരാട്ടമായിരുന്നു. 1857-ലെ ശിപായി ലഹള എന്നറിയപ്പെടുന്ന ഒന്നാം സ്വാതന്ത്ര്യസമരം മുതൽ, മഹാത്മാഗാന്ധിയുടെ നേതൃത്വത്തിലുള്ള അഹിംസാത്മക സമരങ്ങളും ഭഗത് സിംഗ്, സുഭാഷ് ചന്ദ്രബോസ് തുടങ്ങിയ ധീരന്മാരുടെ വിപ്ലവ പോരാട്ടങ്ങളും ബ്രിട്ടീഷുകാരുടെ കൈകളിൽ നിന്നും ഇന്ത്യ സ്വതന്ത്രമാകുന്നതിൽ മുഖ്യ പങ്കുവഹിച്ചു. ദണ്ഡിയാത്ര, ക്വിറ്റ് ഇന്ത്യാ സമരം തുടങ്ങിയ ജനകീയ പ്രക്ഷോഭങ്ങൾ ഇന്ത്യയുടെ സ്വാതന്ത്ര്യത്തിന് വഴിതുറന്നു.

ഈ പോരാട്ടങ്ങളിൽ ജീവൻ ബലിയർപ്പിച്ച ധീര രക്തസാക്ഷികളെ ഈ ദിവസം നാം ഓർക്കുന്നു. അവരുടെ ത്യാഗങ്ങളാണ് ഇന്നത്തെ നമ്മുടെ സ്വാതന്ത്ര്യത്തിന്റെ അടിസ്ഥാനം. ജാതി, മതം, ഭാഷ, വർഗ്ഗം എന്നിങ്ങനെയുള്ള എല്ലാ വേർതിരിവുകൾക്കും അതീതമായി ഭാരതമെന്ന ഒറ്റവികാരത്തിൽ അണിനിരന്ന് പോരാടിയ ആ മഹത്തായ ജനതയുടെ ഓർമ്മകൾ ഈ സ്വാതന്ത്ര്യദിനത്തിൽ നമുക്ക് വീണ്ടും പുതുക്കാം.

സ്വാതന്ത്ര്യം നേടി 78 വർഷങ്ങൾ പിന്നിടുമ്പോൾ ഇന്ത്യ ഒരുപാട് മുന്നോട്ട് പോയിരിക്കുന്നു. കാർഷികരംഗത്തും, ശാസ്ത്ര സാങ്കേതിക വിദ്യാരംഗത്തും, വിദ്യാഭ്യാസ മേഖലയിലും, ബഹിരാകാശ ഗവേഷണരംഗത്തും ഇന്ത്യ കൈവരിച്ച നേട്ടങ്ങൾ ലോകത്തിന് മാതൃകയാണ്. ലോകത്തിലെ ഏറ്റവും വലിയ ജനാധിപത്യ രാജ്യമായി നമ്മൾ തലയുയർത്തി നിൽക്കുന്നു.

ഓരോ സ്വാതന്ത്ര്യദിനവും, നമ്മുടെ രാജ്യത്തിന്റെ പുരോഗതിയെക്കുറിച്ചും ഭാവിയെക്കുറിച്ചുമുള്ള ചിന്തകൾക്ക് ഊർജ്ജം നൽകുന്നു. രാജ്യത്തിന്റെ അതിരുകൾ കാക്കുന്ന ധീര ജവാൻമാരെയും, രാജ്യത്തിന്റെ പുരോഗതിക്കായി അക്ഷീണം പ്രയത്‌നിക്കുന്ന ഓരോ പൗരനെയും ഈ ദിവസം നാം ആദരിക്കുന്നു.

ഇന്ത്യയുടെ 79-ാമത് സ്വാതന്ത്ര്യദിനം ആഘോഷിക്കുമ്പോൾ, നമ്മുടെ മുന്നിലുള്ള വെല്ലുവിളികളെക്കുറിച്ചും നമുക്ക് ചിന്തിക്കാം. ദാരിദ്ര്യം, നിരക്ഷരത, അസമത്വം തുടങ്ങിയ പ്രശ്‌നങ്ങളെ മറികടന്ന് ഒരു വികസിത രാഷ്ട്രമായി മാറാനുള്ള ശ്രമങ്ങൾ നമ്മൾ തുടർന്നുകൊണ്ടേയിരിക്കണം. ഐക്യത്തോടെയും സമാധാനത്തോടെയും മുന്നോട്ട് പോയാൽ മാത്രമേ നമ്മുടെ പൂർവ്വികർ സ്വപ്നം കണ്ട ഭാരതം യാഥാർത്ഥ്യമാവുകയുള്ളൂ.

ഈ സ്വാതന്ത്ര്യദിനത്തിൽ, രാജ്യത്തിന്റെ പുരോഗതിക്കായി പ്രവർത്തിക്കാനും, ഇന്ത്യയുടെ ഐക്യം കാത്തുസൂക്ഷിക്കാനും നമുക്ക് പ്രതിജ്ഞയെടുക്കാം. ഓരോ പൗരനും രാജ്യത്തോടുള്ള കടമ നിറവേറ്റുമ്പോൾ മാത്രമേ സ്വാതന്ത്ര്യത്തിന്റെ യഥാർത്ഥ അർത്ഥം പൂർണ്ണമാവുകയുള്ളൂ.