ന്യൂഡൽഹി: നടപ്പു സാമ്പത്തിക വർഷം സെപ്തംബറിൽ അവസാനിച്ച പാദത്തിൽ ഐഫോൺ നിർമാതാക്കളായ ആപ്പിളിന്റെ ഇന്ത്യയിലെ വരുമാനത്തിൽ റെക്കോർഡ് വർധന. ഐഫോൺ വിൽപ്പന വർധിച്ചതും ഐപാഡ്, മാക് ബുക്ക്, എയർപോഡ്‌ തുടങ്ങിയവയുടെ ഉയർന്ന ആവശ്യകതയുമാണ് വരുമാനം ഉയരാൻ കാരണമായത്. അതേസമയം, വരുമാനം എത്രയാണെന്ന് കമ്പനി വെളിപ്പെടുത്തിയിട്ടില്ല.
ഏകദേശം 400 കോടി ഡോളർ (33,700 കോടി രൂപ) വരുമാനം ഇന്ത്യൻ വിപണിയിൽനിന്ന് നേടിയിട്ടുണ്ടാകുമെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. മൊബൈൽ ഫോൺ വിപണിയിൽ വരുമാനത്തിന്റെ അടിസ്ഥാനത്തി‌ൽ 22 ശതമാനവുമായി രണ്ടാം സ്ഥാനത്താണ് ആപ്പിൾ ഐഫോൺ. 22.8 ശതമാനവുമായി സാംസങ് ആണ് ഒന്നാമത്.
ആപ്പിളിന്റെ ആഗോള അറ്റ വിൽപ്പനയിൽ ആറുശതമാനം വർധനയാണ് കഴിഞ്ഞപാദത്തിൽ രേഖപ്പെടുത്തിയത്. 9,500 കോടി ഡോളറിന്റെ വിൽപ്പന ഇക്കാലയളവിൽ രേഖപ്പെടുത്തി.
