മുംബൈ: ഐസിസി ചാമ്പ്യൻസ് ട്രോഫി ക്രിക്കറ്റിനുള്ള ഇന്ത്യൻ ടീമിനെ ഉടൻ പ്രഖ്യാപിക്കും. സെലക്ഷൻ കമ്മിറ്റി യോഗത്തിന് ശേഷം ക്യാപ്റ്റൻ രോഹിത് ശർമയും സെലക്ഷൻ കമ്മിറ്റി ചെയർമാൻ അജിത് അഗാർക്കറും ഇന്ന് ഉച്ചയ്ക്ക് 12.30ന് വാർത്താസമ്മേളനം വിളിച്ചിട്ടുണ്ട്. മുഖ്യ പരിശീലകൻ ഗൗതം ഗംഭീർ വാർത്താസമ്മേളനത്തിൽ പങ്കെടുക്കില്ലെന്നാണ് വിവരം.
ഇംഗ്ലണ്ടിനെതിരായ ഏകദിന പരമ്പരയ്ക്കുള്ള ടീമിനേയും ഇതിനോടൊപ്പം പ്രഖ്യാപിക്കുമെന്നും ബിസിസിഐ പ്രസ്താവനയിൽ അറിയിച്ചിട്ടുണ്ട്. ട്വന്റി-20 പരമ്പരയ്ക്കുള്ള ടീമിനെ നേരത്തെ പ്രഖ്യാപിച്ചിരുന്നു. അഞ്ചു ട്വന്റി-20 മത്സരങ്ങളും മൂന്ന് ഏകദിന മത്സരങ്ങളുമാണുള്ളത്.
ഓസ്‌ട്രേലിയൻ പരമ്പരയ്ക്കിടെ പുറംവേദനയെത്തുടർന്ന് ഡോക്ടർമാർ വിശ്രമം നിർദേശിച്ചിട്ടുള്ള ബുംറ, ചാമ്പ്യൻസ് ട്രോഫിക്കുള്ള ടീമിലിടംനേടുമോ എന്നതാണ് ഏറെ ശ്രദ്ധേയം.
ഓസ്‌ട്രേലിയൻ പരമ്പരയ്ക്ക് പിന്നാലെ താരങ്ങൾക്കും സപ്പോർട്ടിങ് സ്റ്റാഫ് അംഗങ്ങൾക്കും ബിസിസിഐ കർശന നിയന്ത്രണങ്ങളേർപ്പെടുത്തിയിരുന്നു. ടീമിൽ ഭിന്നതകളുണ്ടെന്ന റിപ്പോർട്ടുകളും നിലനിൽക്കെയാണ് രോഹിത് ശർമയും അജിത് അഗാർക്കറും ശനിയാഴ്ച മാധ്യമങ്ങൾക്ക് മുന്നിലെത്തുന്നത്. ഇത് സംബന്ധിച്ചുയരുന്ന ചോദ്യങ്ങൾക്ക് ഇരുവരും മറുപടി നൽകും.
